De Cantabru-Estremeñu

Iventia é un proyeutu pa escrevir comunitariamenti un cumpendiu de conocencia livri enas variais cántabru-estremeñas y dotrus dialeutus y linguas minoriçaus. Jue cominciáu pur Carlos Quiles l'ún de mayu de 2004 cumu página de noticias n'estremeñu, palra d'El Rebollar y jalamegu (a fala). Tres dun curtiu periodu inicióssi un intentu d'acercamientu a las variais que Menéndez Pidal classijicó cumu "leonés", criándussi assina l'asturlheonés unifhicáu (primer versión), proyeutu que, amás de ser dalgu utópicu pola situación política y alministrativa actual, era pucu estéticu y quiciávis demasiáu incorreutu, dáu'l gran acercamientu que jizimus á l'asturianu-leonés ucidental (ya de pur sí mui diferenciáu sigún las javlas) y á l'olvíu de los rasgus del mayoritariu asturianu central y el cántabru-estremeñu ó "leonés oriental"; assina, el nuéu proyeutu, ya aceutáu cumu intentu teóricu, trata desjazer essus fallus.

La nueva versión en cántabru-estremeñu cominció oficialmenti l'ún de juliu de 2006, mentris que la versión n'asturianu-llionés lu jizu en setiembri. Agora tol testu y munchas de las imáginis tan liverás baju diversas licencias livris cumu las Creative Commons ó la GNU FDL. Las cuntrivucionis permanecin cumu propiedá de los sus criaoris y editoris, mentris que las nuestras licencias asseguran el carauter de livri distrivución y reprodución de los artículus.

Repari

- Editar un artículu pa agregá-las tus conocencias sobri cualquier tema é fácil cula nueva Iventia.

- Esti proyeutu intenta cunfeicionar un cumpendiu del saber de caltiníu livri. A diferencia de la Wikipedia, a Iventia puen unviassi artículus d'opinión y ensayus acerca de múltiplis temas relacionaus cul tema general de la wiki. Ensin embargu, en general sólu cabin ideas relacionás cul nuestru cunceutu lingüísticu.

- É mui importanti respetar los direchus d'autor ó copyright dotras páginas. Nu incluyas equí el su caltiníu, purqui é un actu delictivu que puei trayer cumplicacionis pal nuestru ojetivu.

- Tampocu si permiti ençarrar baju copyright n'otra web lu qu'equí s'escrivi livrimenti, y avondus de los caltiníus nu puein cambiassi. Nusotrus lavutamus pa qui la genti tomi conciencia de la dessistencia del cántabru-estremeñu y demás variais amenaciás; si s'escuegi la información á amuestrar en dellus casus y s'eliminan los nuestrus cunceutus, el nuestru lavor si destrúi.