Cantabru-EstremeñuMain Page | About | Help | FAQ | Special pages | Log in
The Free Encyclopedia
Printable version | Disclaimers

Jerti

From Cantabru-Estremeñu

Jerti


Jerti es una localiá d'alreol d'unus 1.350 abitantis inclavá ena cumalca'l norti cazriñu llamá Valli'l Jerti, cumalca d'una belleda incumparabli. L'economía los sus abitantis ependi jundamentalmenti e' dos árias cumpletamenti comu sen el curtivu'l ceredu y el turismu. L'escalpau'l terrenu jadi que l'agricurtura s'esarroyi'n pequeñus minijundius con jincas abancalás en gavias y qu'ificulta la mecanidación del campu. Otru pilal abondu importanti pa l'economía jerteña es el turismu. Debíu a la belleda naturá e' la zona,a las sus cristalinas auguas, al su agraabli clima, a las sus flora y fauna, al espeutaculá panorama del ceredu'n flol, al su monti "Reboldu", a la Reselva Natural e' la Garganta los Infiennus,... s'está esarroyandu'n Jerti una attiviá turistica empoltanti con casas ruralis, piscinas naturalis, otelis, apartamentus ruralis, risturantis, servidius a la coletiviá,...

Estoria

N'Abril del añu 1809 los francesis quisun adentrasi nel Valli endi'l Barcu d'Ávila, peru los cumbatientis e' Jerti ayudarun al altoncis curonel Francisco Fernandez Golfín (mas tardi allegaría a sel Menistru la Guerra) y los ombris del cumandanti Diego gonzalez Aragonés a rechazalus ena puenti Beceas. Esta oposidion e' los jerteñus al invasó jue la causa e' l'estrución e' la villa'l 21 d'Agostu d'esi mesmu añu. En dita jonná se presentan en Jerti e' sorpresa una nutría seción del duqui d'Alsacia y los vidinus apenas tuvun tiempu e' juyí p'al monti endispués d'abel emputecíu los sus enseris enos suterranius buegonis. L'enemígu procei a la quema sistematica e' tolas casas impiyendu que los lugareñus puean sofoca'l incendiu. Solu quean en pies ochu e' las 275 casas desistentis altoncis. Los francesis permanedierun un mes ena localiá obrigandu asina a los jerteñus a rifugiasi enas sierras en cuevas y enti canchalis, abondu nu soportarun la dura prueba. Cuandu'l invasol se retiró, los jerteñus bajarun y s'alcuentrarun con un espeutaculu esolaol: n'abía queau na, ni casas, ni enseris, ni camastras, ni ropajis, ni jerramientas,... mas qu'unu marchó pa pueblus vidinus landeandu parientis delcanus y algotrus se vierun obrigaus a vivil en chodas. Peru tos se pusun manus a la obra pa ricustruí'l su puebru que jue capás e' risurgí.

Retrieved from "https://www.iventia.com/cantabru-estremenu/index.php/Jerti"

This page has been accessed 2,004 times. This page was last modified 17:09, 1 June 2008. Content is available under Asturleones.


Find
Browse
Iniciu
Noticias
Mapas lingüísticus
Gramática
Filología asturlionesa
Hestoria de la lingua
Geografía
Literatura
En xalimegu
Portal de la Comunidá
Cambius Recientis
Página Aleatoria
Asturleonés
Edit
Edit this page
Editing help
This page
Discuss this page
Post a comment
Printable version
Context
Page history
What links here
Related changes
My pages
Create an account or log in
Special pages
New pages
File list
Statistics
Bug reports
More...