asturleones — Las variais cántabru-estremeñas y asturianu-leonesas

Propuesta de historia de la variedad ‘cántabroextremeña’. Publicada en 2005 en la antigua Wiki de Iventia

El cántabru-estremeñu (tamién cántabru ó estremeñu, extremaduran pa los lingüistas internacionalis) é un dialeutu d’España (lingua des dun puntu de vista internacional, ya qui las havlas son altoncis dialeutus), classihicáu á vezis dientru las variais asturleonesas hunta l’asturianu-leonés y al mirandés pur organiçacionis internacionalis y nacionalis – grupu llamáu asturcántabru por dalgunus, leonés pur Menéndez Pidal -, y á vegás tamién cumu variá del grupu castillanu antigu (“cántabru-castillanu”), hunta’l castillanu y al ladinu ó hudeu-español, pesie á non ser oficial enas comuniais ondi tuavía si palra.

Suel izissi qui las variais cántabru-estremeñas cunhorman una zona di tránsitu ente’l castillanu y l’astur-leonés (cántabru-estremeñu), ó ente istus y el gallegu-purtugués (xalimegu); tamién suel havlassi de variais de tránsitu ó fronterizas (“castúo”, firreireñu, barranqueñu) relacionás; desta manera s’arrehuntan nuna mesma división lingüístiva diferentis variais qui, sarvandu las sus grandis diferencias, tan relacionás pola su istoria y los sus rahus lingüístivus.

El cántabru-estremeñu

El cántabru-estremeñu é la variá más conocía d’ente las riferías, y pussivlimenti la mayoritaria – oi día é difícil izir hasta qué puntu si palra’l dialeutu, tinendu’n cuenta que páginas cumu ésta de difusión toman cumu ciertus los estuyus lingüístivus antigus, mientris que los manualis de filología ispánicus ricuegin namás los estuyus localis limitaus autualis y tratan siempris d’iguar havlas castillanas cun dialeutus istóricus, istu é, tratan de la mesma horma los dialeutus en sintíu sincrónicu (distintas havlas de lu qui é cunsideráu una idioma, nesti casu l’español) y los dialeutus en sintíu diacrónicu (nel nuestru casu los dialeutus derivaus direutamenti del latín, cumu l’astur-leonés y l’aragonés), de manera qui las nuestras posicionis enhamás s’alcuentran sobri’l papel, dandu siempris dos versionis qui sedrán escuegías por sigún quién las leya.

Sabemus qui nu vamus los unus en contra los otrus, dambus queremus protegé-las distinitas variais ispánicas, peru cun distintu cunceutu: pa dalgunus de nusotrus é mui importanti’l hechu de que las variais istóricas surdieran al mesmu tiempu – el castillanu pussivlimenti surdió inclusu dimpués de los otrus, pola misturancia d’illus -, purqui issu sinnihica la possessión duna tradición milenaria ena horma palrar, un riflehu enormi de la intraistoria unamuniana de los nuestrus puiblus y regionis; mientris que pa los qui dihiendin el prestigiu del castillanu (ó las sus variais regionalis) pur encima de tou, el qui dotras havlas surdierin sieglus dimpués y principalmenti del mesmu dialeutu castillanu nu é impedimentu pa igualas á los dialeutus cuya istoria va pareha á la dél. Desta horma, ciertus ispanistas (Manuel Alvar pur ehemplu) cunsideran las havlas asturianas y las andaluças cumu ‘dialeutus’, en siñalandu assina una relación de subordinación al castillanu, en vezi d’insistir duna horma efeutiva en que la primer vien del latín des de haz más de milenta añus y devi ser protegía cumu’l gallegu ó el catalán (de los qui nu s’atrevin á palrar cumu d'”ispánicus”), mientris que l’andaluç surdió haz unus cientus d’añus desgaháu del castillanu. Pa nusotrus, en dehinitiva, el cántabru-estremeñu é un dialeutu y el castillanu una lingua pur cunsideracionis istóricu-sociulógicas (filológicas, si si quier), non estrictamenti lingüístivas; ensín embargu, l’andaluç, de la mesma horma que l’argentinu ó el mehicanu (aunqui perteneçan á paísis indipendientis) nu puein cunsiderassi linguas bahu dengún puntu de vista.

Si l’asturianu-leonés vien de la influyencia que sobri’l latín tuvu’l puiblu astur duranti sieglus, lu mesmu puei izissi del cántabru-estremeñu, que surdió ena zona de los antigus cántabrus, qui, hunta los asturis y vascus, hormun los sustratus lingüístivus del norti qui de cuntinu prevalecierun frenta los distintus invasoris de la Península Ibérica, y cuyus decendientis moldearin tres de la invasión árabi la istoria d’España á partir la Ricunquista. La influyencia de las dos variais eha vessi nel castillanu, y al mesmu tiempu ésti é diversu d’aquíllus; oi en día, enque la influyencia di la lingua de prestigiu aiga defiguráu avondu’l mapa lingüístivu istóricu, siguin siendu goyíus los dos dialeutus vizinus, si bien unus más que dotrus…

El su origin

Istóricamenti paíç que perteneç al dumiñu d’influyencia de los cántabrus sobri’l latín vulgar – dimpués de la ocupación romana y visigoda -, hechu que Menéndez Pidal ya recuegió nel su día al palrar de la separtación (dientru’l “dialeutu leonés”) del “leonés oriental”, devíu sigún él á la influyencia de las havlas de los puiblus asturis y cántabrus antigus – issu sí, él nu estuyó las variais más á l’esti d’Asturias, polu qui nu sabemus ondi taríe’l límiti á la su classihicación de las palras del “leonés”. Bahu ista perspeutiva, la variá oriental asturianu-leonesa (aspiración de la f– latina, terminación general en –u, neutru de materia en –u, etc.) taríe á meyu camín ente l’asturianu-leonés y el cántabru-estremeñu, á l’igual qui la fala d’entrambasauguas – y en cierta midía l’asturianu ucidental – taríe á meyu camín ente l’asturianu-leonés y el gallegu oriental, cumu mistura de los antigus puiblus asturis y galaicus.

Los núcleus de pueblación ispánicus ucidentalis enantis de la Ricunquista y la zona de ñacencia del castillanu, sigún amuestran los datus lingüísticus

En definitiva, pa ehar di puner etiquetas de “variá de tránsitu” ó “d’entremeyas” á tolas variais emparentás pola cumpartición d’isoglossas, puiría izissi ensín temor á equivocassi qu’ena Cantabria actual cunfluyin munchas de las isoglossas de las variais qui divan imponessi nel su territoriu haz sieglus, ena época de l’iniciu de la Ricunquista: l’asturianu-leonés pur mé’l Reinu d’Asturias, luéu Asturleonés ó de León; y el castillanu pur mé’l Condáu (luéu Reinu) de Castiella y, más tardi, de la España unihicá.Ensín embargu, icha cunfluyencia nu supón una real subordinación lingüístiva á los dialeutus vizinus; facilita, issu sí, el trabahu á aquillus qui quiein reuzir l’espeutru d’estuyu lingüísticu á dos ó tres variais peninsularis, piru la istoria y la lingüística palran pur sí solas: el cántabru hui un núcleu dialeutal latinu des del comienciu, cumu’l galaicu y l’astur. Lu que sí tien d’izissi tamién é que los paicíus morfulógicus y (especialmenti) sintáuticus- pesie á las diferencias fonéticas- cul asturianu-leonés – son tan grandis que puei palrassi dun subgrupu iberu-romanci asturleonés nel que taríe incluyíu el cántabru-estremeñu.

Nucleusispanicus — Los núcleus de pueblación hispánicus ucidentalis enantis de la Recunquista y la zona de ñacencia del castillanu, sigún amuestran los datus lingüísticus

Las estadísticas qui si manehan sobri’l númiru de havlantis autualis son antiguas y non mui fiavlis: nu dessisti interés pol momentu de her estuyus desti tipu, dáu que primer de tou avríe qu’alcuentrar enos palrantis una cierta cultura pa qui distinguiessin la su horma de palrar de la estándar castillana, tinendu’n cuenta qu’un estuyu á la vegá lingüísticu y sociulógicu taríe huira de tou proyeutu investigaor viavli. Ensín embargu, é bien sabíu qu’avondus viehus classihican enas encuestas las sus palras regionalis cumu “montañés” y “castúo” enas sus respeutivas comuniais, términus que hazin referencia á tolas havlas de la región nel su cunhuntu; difícilmenti, emperu, puiría sacassi dalguna cunclusión desti hechu. Pussivlimenti seyan unus milis los mayoris qui aún cunsirvan rahus dialeutalis qui puein identihicassi cul istóricu dialeutu cántabru-estremeñu.

El cántabru-estremeñu suel dividissi’n dos variais principalis, separtás polos sus rahus lingüístivus y la su distancia geográfica: el cántabru y l’estremeñu, enque las variais más arcaiçantis dún (passiegu) y d’otru (sirragatinu) – ailás pol relievi muntañosu carauterísticu dambas – tiein quiciávis más en común ente sí qui culas sus vizinas geográficas.

Cántabru

Cantabru — El cántabru sigún estuyus lingüístivus recientis

El cántabru, variá más arcaica sintáuticamenti piru fonéticamenti assemehá al castillanu, pálrassi principalmenti en Cantabria, n’al minus cuatru variais principalis:

Cántabru ucidental: cun dos variais diversas, la norti, havlá nel orienti asturianu y enos municipius cántabrus lindandu cun Asturias; y la sur, havlá ena comarca cántabra de Liébana y ena muntaña palentina.

Montañés: havláu ena comarca de Saja-Nansa principalmenti.

Passiegu: havláu nel Valli del Pas y al norti de Burgus.

Cántabru oriental (dessapaicindu): goyíu ena región d’Asón, ta á l’igual qu’el passiegu sureñu amenaciáu pola influyencia de la lingua culta.

Cántabru ucidental

Havla del cántabru-estremeñu y dientru dél, del cántabru.

Variá norti: palrá enos cuncehus asturianus de Llanes, Peña Mellera Alta, Peña Mellera Baha y Riba de Deva, y enos municipius cántabrus de Peñarrubia, Lamasón y Tresvisu, .

Variá sur: en Cantabria, enos cuncehus de Camaleñu, Cabeçón de Liébana, Cillorigu de Liébana, Pesagueru, Potes y La Vega de Liébana; en Palencia, ena comarca de la Muntaña Palentina.

Rahus lingüístivus:

Del cántabru-estremeñu

– Palataliçación de –l anicial latina en restus lessicaliçaus intensus: llar, llodu, llamizu, llastra, llaráu,,…

– Piecháu de las vocalis –o,-e: trampusu, pirru, nigru, esti,…

– Aspiración de F– anicial latina intensa: hacer, hornu, higu, hilu, hoscu, híu,…

– Aspiración del fonema antigu /x/ pur influyencia de l’aspiración de la F- anicial latina: caha, paha, rohu,…

– Aspiración de los latinus –x– y –ss– : dehar, truhi, bahu

– Aspiración de los grupus –Cei-, –Gei– y –Lj– latinus: muher, trabahu, cuncehu,…

– Diptongación crecienti: oriéganu, priessa, culievri, …

– Palataliçación de la –n: ñuvi, ñú, ñogal, uñir, cañali,…

– Cunsirvación de l’antigua –e latina: redi, hoci, haci, cruci, veci, peci, sedi, vidi,…

– Mantinimientu d’antiguas aspiracionis: giernu, gielar, genciva, germanu,…

– En grupu cunsunánticu motiváu pur perda de vocal latina, la primer cunsunanti si haz –l: hulgar, delda, dulda,…

– Epéntesis de –j-: unturia, grancia, urnia, matancia, esperancia, ataharria,…

– Tendencia á la perda de las cunsunantis sonoras derivás de las surdas latinas: miéu, rendíu, tou, fuéu, lau, Estremaúra, …

– Caltenimientu del grupu –mb– latinu: pomba, lambel, lomba,…

– Cambéu del grupu –rl-: mielru, palral, calranca, chalra, bulra, pelra, cholritu,…

– Hormas vervalis del grupu –zc– en –ç-: conoçu, agraeçu, paeça, creça, reúça,…

– Empregu de possessivu enantis de l’articulu: el mi híu, la tu casa,…

– Terminación general y diminutivu: -in, -inu

Del Cántabru:

– El neutru de materia ta generaliçáu

– Hormas vervalis en –er: morrer, dicer, xuncer, rañer,… Peru tamién tusir, atrevir, tañir,…

– Hormas semicultas –ut y (minus frecuenti) –it del latinu –ct: aceutar, dessautu, cumpautu,…

– Yeísmu nel orienti

Propius

– Terminación general –u. Terminación general –i ena variá sur.

– Plural hemininu –as, –es

– Plural masculinu –os, –es

– Contración: nel, ena, enos, enas; conos, conas;

Passiegu

Havla del cántabru-estremeñu y dientru dél, del cántabru.

Palrá en Cantabria enos cuncehus de Liérganes, Luena, Miera, Penagus, San Peiru del Romeral, San Roqui de Riumiera, Santa María de Cayón, Selaya, Vega de Pas, Villacarriedu, y en parti de Villafufri; en Burgus, nel norti de la comarca de Merindais.